Өндөр нас ба тархи

Гэри Смолл Эмч, Herbalife Nutrition компанийн Шим тэжээлийн зөвлөлийн гишүүн

Дэлхий даяар хүмүүс илүү урт наслах болжээ. Нэгдсэн Үндэстний Байгууллагын Дэлхийн хүн амын хэтийн төлөв: 2019 оны шинэчлэгдсэн хувилбараас харвал 2050 он гэхэд дэлхийн зургаан хүн тутмын нэг нь 65-аас дээш насныхан байх аж. Энэ нь 2019 онд 11 хүн тутмын нэг гэсэн үзүүлэлтээс хавьгүй өндөр дүн юм. 80 ба түүнээс дээш насны хүмүүсийн тоо гурав дахин нэмэгдэх төлөвтэй байна. Энэ үзүүлэлт 2019 онд 143 сая байсан бол 2050 онд 426 сая болохоор байна.

Бид хөгшрөлтийн талаар бодохдоо арьс, яс, уушги, зүрхний эрүүл мэндээ ихэвчлэн боддог. Гэхдээ хүний ​​биеийн хамгийн чухал эрхтнүүдийн нэг болох бидний тархи яах вэ?

Тархи нас ахих тусам өөрчлөгдөж, түүнийг дагаад сэтгэцийн үйл ажиллагаа ч хувирдаг. Тархины хөгжил, хөгшрөлтийг ойлгох тусам сонирхолтой асуултууд гарч ирдэг. Бид амьдралынхаа туршид танин мэдэхүйгээ хэрхэн хадгалах вэ? Бид нас ахих тусам тархиа удирдаж чаддаг уу? Хэрэв тийм бол бид нас ахих тусам танин мэдэхүйн эрүүл мэндийг хамгаалахын тулд юу хийж чадах вэ?

Амьдралын бүх үе шатан дахь тархины хөгшрөлт

Хэлний үзүүрт байгаа хэр нь хэлж чадахгүй байгаа үг эсвэл таны яг тавьсан газар байхгүй байгаа гэрийн түлхүүр гэх мэтээр хүн болгонд ой санамж нь муу ажиллах үе тохиодог. Нас ахих тусам ийм тохиолдол нэмэгддэг. Gallup-ийн санал асуулгаар залуу насанд хүрэгчдийн 14%, дунд насны хүмүүсийн 22%, ахмад настнуудын 26% нь ой санамжиндаа сэтгэл дундуур байдаг байна. Гэхдээ насанд хүрэгчид эрүүл дадал зуршилтай болсноор ой санамжийн асуудалтай бага тулгарах боломжтой. Тархи хөгшрөх жам ёсны 3 үе шат байдаг.

1. Хэвийн хөгшрөлт (ой санамж буурах нь бага бөгөөд харьцангуй тогтвортой байдаг)
2. Танин мэдэхүйн бага зэргийн сулрал (танин мэдэхүйн асуудал тохиолдох боловч бие даан амьдрах чадварт нөлөөлдөггүй)
3. Зөнөгрөл (танин мэдэхүйн асуудал нь хүний бие даан амьдрах чадварт нөлөөлдөг)

Хөгшрөл ба тархи гэх сэдвээр хийгдсэн саяхны судалгаагаар ой тогтоолтын чадвар дунд наснаас эхлэн буурдаг болохыг харуулсан. Энэ нь ялангуяа хэвийн хөгшрөлттэй хүмүүсийн хүн таних асуудал биш харин эргэн санах чадварт хамааралтай. Эргэн санах чадвар буурах нь Альцгеймерийн өвчний үед ажиглагддаг ой санамж алдагдах шинж чанарын нэг юм.

Нас ахихын хэрээр тархины эрүүл мэндээ хэрхэн хамгаалах вэ?

Тархи хөгшрөх нь тодорхой хэмжээгээр зайлшгүй хэдий ч хүн бүрийн хувьд харилцан адилгүй юм. Удамшил, амьдралын хэв маяг, хүрээлэн буй орчин зэргээс шалтгаалан хүн бүрд өөр өөрөөр нөлөөлдөг. Танин мэдэхүйн чадвар, ой санамж муудаж байгаа шинж тэмдэг багатай хүмүүсийн дунд эрүүл, идэвхтэй амьдралын хэв маяг зонхилж байгааг нотолсон олон судалгаа бий. Мөн дундаж наслалт өндөр газар нутгуудад антиоксидант жимс болон ногоо, эрүүл үр тариа болон уураг ихээр агуулсан хооллолт, тогтмол дасгал хөдөлгөөн болон нийгмийн бат бөх холбоо гэсэн нийтлэг шинж чанарууд тохиолддог. Эрүүлээр хөгшрөх үйл явцыг дэмжихийн тулд бие болон оюундаа анхаарах хэрэгтэй. Өнөөдөр танд урт наслах амьдралын хэв маягийг хэрэгжүүлж эхлэхэд туслах зөвлөмжүүдийг хүргэе.

1. Тархиа эртнээс дасгалжуулж эхэл

Танин мэдэхүйн үйл ажиллагаа нэгэнт доголдож зөнөгрөх өвчин болтлоо хүндэрвэл эргэн сэргэхэд хэцүү эсвэл бүр боломжгүй. Тийм ч учраас их хэмжээний засвар хийх гэж оролдохын оронд эрт нөлөөлөх, эрүүл тархийг хамгаалахад анхаарах нь чухал. Унших, үгийн тоглоом тоглох, шинэ ур чадвар эзэмших зэрэг оюун ухааныг идэвхжүүлэх үйл ажиллагаанд илүү их цаг зарцуулдаг хүмүүс ой санамж, мэдээлэл боловсруулах хурд, анхаарал төвлөрөл, ойлгох чадвараа хадгалах, бүр сайжруулах магадлал өндөртэй байдаг нь судалгаагаар тогтоогдсон.

Тархи нь булчингийн нэгэн адил тогтмол дасгал хийснээр үйл ажиллагаа нь сайжирч байдаг. Сэтгэцийн үйл ажиллагааг өдөөлт нь мэдрэлийн хэлхээг идэвхжүүлдэг бөгөөд Альцгеймерийн эрсдэлийг бууруулдаг. Боловсролын ололт амжилт, хос хэлтэй байх эсвэл эвлүүлдэг тоглоом тоглох зэрэг нь сэтгэцийн үйл ажиллагааны хомсдолд орох эрсдэлийг бууруулдаг болохыг харуулсан. Санах ойн сургалт нь ой санамжийг сэргээж, танин мэдэхүйн чадварыг тав ба түүнээс олон жил хадгалахад тусалдаг.

2. Идэвхтэй байж, эрүүл хоолло

Судалгаануудаас үзэхэд кардио дасгал хөдөлгөөн хийдэг хүмүүсийн зулай, чамархай болон тархины урд хэсэг томордог нь танин мэдэхүйн үйл ажиллагаа илүү идэвхтэй байгааг илтгэдэг. Дасгал хөдөлгөөнийг тэнцвэртэй хооллолттой хослуулах нь тархины эрүүл мэнд, зүрх судасны хэвийн үйл ажиллагааг дэмждэг. Тархины үйл ажиллагааг дэмжих эрүүл хооллолтыг сонгоорой.

• Загас, самар зэрэг омега-3-аар баялаг хоол хүнс идэх.
• Нэрс, артишок зэрэг антиоксидант ихтэй жимс, хүнсний ногоо идэх.
• Боловсруулсан хүнсний бүтээгдэхүүнээс татгалзах.

Шим тэжээл болон дасгал хөдөлгөөн нь дангаараа өвчин үүсэхээс сэргийлж, хөгшрөлтийн үр нөлөөг арилгадаггүй бөгөөд эдгээр нь бие махбодыг эрүүл байлгадгийг санаарай.

3. Эмийн хэрэглээг хянах

Эрүүл мэндээ зохицуулахын тулд эмчтэйгээ хамтран ажиллах нь чухал юм. Цусны даралт, холестерины хэмжээг бууруулах эм нь тархины эрүүл мэндийг сайжруулж, тархины эрүүл мэндийг сайжруулж, дундаж наслалтыг уртасгадаг.

4. Хүрээлэн буй орчноо удирдах

Эрүүл орчин бүрдүүлэх нь нэн чухал. Утаа, хөгц болон бусад хорт бодисын нөлөөнд өртөхөөс зайлсхийгээрэй. Мэдээллийн хэт ачаалал, телевизийн донтолт, эмх замбараагүй байдлаас зайлсхийх хэрэгтэй.

5. Эерэг хандлагатай бай

Хүмүүсийн хэлдэг зүйл үнэн: өөдрөг хүмүүс илүү урт насалдаг. Мөн өөдрөг үзлийг өөртөө суулгаж болно. Зарим хүн шашин эсвэл байгальтай зохицох замаар эерэг хандлагыг олж авдаг. Өөрийн сэтгэл хөдлөл, биеийг мэдрэн ухаарах, иог эсвэл бясалгал хийх нь таны энэ чиглэлд явах замын эхлэл юм.

6. Нийгмийн харилцаанд илүү ойр бай

Сайн, муу аль ч нөхцөлд найдаж болох хүчирхэг нийгмийг төлөвшүүлэх нь дэмжлэг, хайрыг мэдрэхэд чухал юм. Судалгаанаас үзэхэд нийгмийн бат бөх харилцаатай байх нь таны мэдрэмжид эергээр нөлөөлж, тархины хөгшрөх үйл явцыг удаашруулж, ой санамжийг хадгалдаг.